夜半鬼搭 lift

tissss

前年結識一班麻雀友，咁巖有一個住喺我屋企附近。因為佢果年要準備會考，佢屋企人就好闊綽咁租0左一層樓俾佢住，方便佢溫書，咁樣反而變成我地嘅私竇。四個麻雀友成日一齊0係佢屋企聚賭。

不過自從發生左單恐佈事件之後，我就唔敢再去佢屋企玩囉！

件事發生0係上年11月，我同兩個雀友一齊去佢屋企打牌，因為第二日係我老竇0既生日，所以我答應老竇無論「溫書」溫到幾夜都一定返屋企，第二朝一早陪佢飲茶。

我0地打牌打到好夜，因為我個位對正門口，我見到門罅好似有條黑影企左喺度，我就即刻細聲同屋主講：「喂，有人喺門口呀，係咪你屋企人突擊0黎check你呀？」

大傢即時停低，屋主即刻問：「邊個？」

沒有應，屋主走去門孔「裝」一「裝」，同我0地講：「冇人喎！」

我0地當時根本冇諗過係d咩野，就繼續打牌，點知我開始聽到有人講野嘅聲音。講咩野就唔係聽得好清楚。屋主坐近門口位，我問佢：「喂，真係有人『裝』我0地喎！似乎唔隻一個，係咪你屋企人0黎曬呀？我聽到佢地喺門口講緊野呀！」

點知佢地三個都話聽唔到聲，我果時仍然好鈍，冇諗住有野。不過果晚我輸左成五舊水，成個禮拜飯錢都輸埋，睇吓個鐘已經係半夜2點。我話唔打要走，佢地三個勸我留低，不過我堅持要走，我果兩個朋友就話：「我地喺度過夜，你走就自己走先。」

我咪冇等佢地，一個人落樓囉。

我入左lift好奇怪，居然層層停。

落到七樓，門一打開，見到有三個「人」企左喺lift口度，我即刻腳軟，唔敢望佢地下半身，因為根本睇唔到！果三個「人」似乎想入lift,佢0地望左我一眼，我即刻合埋眼，一邊唸經，一邊腳震。

唔知過左幾耐，我開眼一望，見到部lift唔知幾時已經落到地下，佢0地都唔見0左，我仍然好驚，腳軟到差0的要爬返出去。你地話喇，我仲敢唔敢再去果度呀!?

[<i> 本帖最後由 oceanpark 於 2006-2-20 03:25 PM 編輯 </i>]