係泰國無意中令隻鬼永不超生

tissss

大慨係2000年，有一個人係泰國旅行，呢單料係咁嘰...
佢去個間酒店叫做 ROYAL HOTEL，都幾殘下，當時佢係旅遊過程中會係個度住一晚，咁佢當晚沖左個靚靚涼就諗住訓番個靚覺拉，點知佢喱埋眼之後，想訓未訓之濟，聽到有人敲門喎，咁佢就走去開門，一開，門口無人既。
跟住佢又番去訓，係想訓未訓，又有人敲門!一開..又無人!!
咁佢提高警覺，走去扮訓覺拉，個人又唔敲，到佢將訓未訓、又敲!..九秒九飛身開門..又無人!!
如事者經過左十幾次，佢已經好火滾! 果個人好似知道佢將訓未訓個種精神狀態，每次都係係佢呢個時侯搞醒佢。
咁佢就唔閂實度門，訓左係張床度拉，諗住等佢一敲門，第一時間飛身開門捉住佢，等下..等下...等到佢想訓未訓...又敲!! 佢再度九秒九彈起! 飛身開門! 但一樣無人! 佢想搵個職員投訴，無奈佢英文又半桶水，有人敲佢度門既英文都唔識講，唯有多一事不如少一事! 但佢都無閂實度門訓，如事者過左半個鐘，度門已經俾人敲左廿幾三十次!!唔開門，佢猛敲，一開門..又無人!
佢想話唔訓，點知又睡魔急CALL，一訓又俾人搞醒，佢忍無可忍，開大度門訓拉，訓左一陣，果然無敲門聲，但佢覺得好無安全感...又訓唔著...一閂門..又敲....
如是者又敲左六七十次! 真係怒從心上起，惡向膽邊生。佢係呢個時間，心度都已經起左殺機，粗口都已經爆到口軟! 佢將度門半掩、訓左係張床度，隻手拎住個行李，諗住再有人搞門，佢就一飛埋去! 一定快過起身開門...
果然! 係佢將訓未訓之間..又敲! 佢精神一震! 反身一野飛個去撞開度門，度門向外拍一聲九十度撞埋牆邊! 依然無人...
但好奇怪，之後成晚都無人再敲門....
第二日，有個職員敲佢度門，嘰呢咕嚕唔知講乜，佢睇下度門出面...原來有一個人影咁既灰色痕跡係度，個人型係好似跳起走緊咁。
佢相信係當晚有隻鬼想玩佢，但估唔到佢咁火爆飛個去撞開度門，隻鬼飄唔切，咁就俾度門夾爆左!!
仲有一件怪事。就係事後佢睇番酒店既門，全部都係向內開既..佢印像當日入房時度門都係向內開的。點解佢訓訓下深夜個陣度門係向外開呢?